पारनेर प्रतिनिधी
पारनेर तालुक्यातील टॅकर घोटाळा प्रकरणात दाखल करण्यात आलेल्या गुन्ह्यातील आरोपींना तातडीने अटक करण्याची मागणी करण्यात आली आहे .
पारनेर तालुक्यातील साई सहारा इंफ्रा अँण्ड फॅसिलीटी प्रा लि . या खाजगी कंपनीच्या सात संचालकांविरोधात गुन्हा दाखल आहे . त्याबाबतचे लेखी निवेदन लोकजागृती सामाजिक संस्थेच्या पदाधिकाऱ्यांनी
जिल्हा व तालुका पोलिस प्रशासनाला दिले .
टँकर घोटाळ्यात कोट्यावधी रुपयांचा अपहार करणाऱ्या आरोपींचा नुकताच अहमदनगर सत्र न्यायालयाने अटकपूर्व जामीन फेटाळला होता .
त्यानंतरही आरोपी सार्वजनिक ठिकाणी मोकाट फिरताना दिसत आहेत . त्यामुळे पोलिस प्रशासनाने त्यांच्यावर अटकेची कारवाई करावी अशी मागणी लोकजागृतीच्या पदाधिकाऱ्यांनी निवेदनात केली आहे .
गुन्हा दाखल होवून अडीच महीने उलटले तरी पोलिस प्रशासन आरोपींना पकडू शकले नाही . त्यामुळे आरोपी सदर गुन्ह्यातील पुरावे नष्ट करण्याची शक्यता आहे . तसेच फिर्यादी व साक्षीदार यांच्यावर दवाब आणत आहेत . त्यामुळे आरोपींना तातडीने अटक करण्याची मागणी करण्यात येत आहे .
या गुन्ह्यात पोलिसांनी आरोपींविरुद्ध बनावटगीरीची वाढीव कलमे लावली आहेत . आरोपींविरुद्ध घोटाळ्याचे सबळ पुरावे असल्यामुळेच सत्र न्यायालयाने अटकपूर्व जामीन नामंजूर केला आहे . आरोपींनी पोलिस तपासाला सामोरे जावून न्यायव्यवस्थे वरील विश्वास कायम ठेवावा . अशी मागणीही निवेदनात करण्यात आली आहे .
याबाबतचे निवेदन पारनेर पोलिस ठाण्यातील सहाय्यक पोलिस निरीक्षक संजय काळे यांना देण्यात आले . यावेळी लोकजागृतीचे बबन कवाद , भानुदास साळवे , शंकर तांबे , अरून रोडे उपस्थित होते .
—————
