पत्रकार परिषदेचा स्थापना दिवस पत्रकारांची आरोग्य तपासणी करून राज्यभरात साजरा करणार, – अनिल महाजन

मुंबई /प्रतिनीधी :

–मराठी पत्रकार परिषदेचा 83 वा वर्धापन दिन 3 डिसेंबर रोजी राज्यभरात साजरा केला जाणार आहे. परिषदेचे मुख्य विश्वस्त माननीय श्री एस एम देशमुख यांच्या संकल्पने नुसार हा वर्धापन दिन गेल्या दहा वर्षा पासून पत्रकारांची आरोग्य तपासणी करून साजरा केला जातो याही वर्षी सर्व जिल्हा व तालुका संघांनी पत्रकार आरोग्य तपासणी शिबिराचे आयोजन स्वयंसेवी संस्थांच्या माध्यमातून करून पत्रकारांची आरोग्य तपासणी करून हा वर्धापन दिन साजरा करावा असे आवाहन मराठी पत्रकार परिषदेचे राज्य जनसंपर्क प्रमुख अनिल महाजन यांनी केले आहे.
३ डिसेंबर १९३९ रोजी मराठी पत्रकार परिषदेची मुंबईत स्थापना झाली. काकासाहेब लिमये हे परिषदेचे पहिले अध्यक्ष होते. तेव्हा पासून गेली ८३ वर्षे परिषदेची अखंड वाटचाल सुरू आहे.येत्या ३ डिसेंबर रोजी परिषद ८४ व्या वर्षात पदार्पण करीत आहे. मराठी पत्रकार परिषदेचा वर्धापन दिन दरवर्षी राज्यात पत्रकार आरोग्य तपासणी दिन म्हणून परीषदेचे मुख्य विश्वस्त एस एम देशमूख यांचे संकल्पनेतून साजरा केला जातो. या दिवशी राज्यातील पत्रकारांची आरोग्य तपासणी केली जाते.असा उपक्रम राबविणारी मराठी पत्रकार परिषद ही देशातील पहिली आणि एकमेव पत्रकार संघटना आहे.. यावर्षी परिषदेने यावर्षी पासून राज्यातील दहा हजार पत्रकारांची आरोग्य तपासणी करण्याचा संकल्प सोडला आहे.
पत्रकारांचे आपल्या आरोग्याकडे अक्षम्य दुर्लक्ष होते. वेळीच काळजी न घेतल्यानं आणि दुर्लक्ष केल्याने छोटे आजार नंतर बळावत जातात आणि मग हाताबाहेर जातात हे टाळण्यासाठी परिषद आरोग्य तपासणी शिबिरं घेते. यावर्षी राज्यातील प्रत्येक जिल्हा आणि तालुका पत्रकार संघाच्या वतीने एकाच दिवशी ही शिबीरं आयोजित करण्यात येणार आहेत. स्थानिक पातळीवर रोटरी, लायन्स क्लब तसेच स्थानिक डॉक्टर मित्रांच्या मदतीने ही शिबिरं घ्यावीत आणि पत्रकार आणि त्यांच्या कुटुंबियांची आरोग्य तपासणी करण्यात यावी असे अावाहन करण्यात आले आहे. या तपासणीतून कोणी गंभीर आजारी असल्याचे स्पष्ट झाल्यास मुख्यमंञी वैद्यकीय कक्षाचे प्रमूख मंगेश चिवटे यांच्या नेतृत्वा खालील सरकारी आरोग्य कक्ष तसेच परिषदेचे आरोग्य विभाग प्रमुख दीपक कैतके यांच्या माध्यमातून पुढील उपचाराची सुविधा उपलब्ध करून दिली जाणार आहे.
राज्यातील सर्व जिल्हा आणि तालुका संघांनी ३ डिसेंबर रोजी आरोग्य शिबीर यशस्वी करावे असे अावाहन परीषदेचे राज्य जनसंपर्क प्रमूख अनिल महाजन यांनी केले आहे.