पुणे प्रतिनिधी
यावर्षीचा महाराष्ट्र केसरीचा मान पैलवान सिंकदर शेखने पटकावला. सिकंदरने गतवर्षीचा महाराष्ट्र केसरी शिवराज राक्षेला चितपट केले. मानाची चांदीची गदा देत सिकंदर शेखचा सन्मान करण्यात आला. पुणे जिल्ह्यातील फुलगाव इथं महाराष्ट्र केसरी कुस्ती स्पर्धा झाली. या स्पर्धेतील अखेरची लढत सिंकदर शेख आणि शिवराज राक्षे यांच्यात झाली. यामध्ये सिंकदर शेखने मैदान मारले.
कुस्तीच्या पंढरीत गंगावेस तालमीत मेहनत घेणाऱ्या सिकंदर शेखने अवघ्या काही सेकंदात ६६ व्या महाराष्ट्र केसरीचा किताब पटकावला. त्याने शिवराज राक्षेला झोळी डावावर चितपट केले. वेगवान आणि आक्रमक कुस्ती खेळणाऱ्या सिकंदर पुढे शिवराजचा निभाव लागला नाही. लढतीला सुरुवात झाल्यावर अवघ्या काही सेकंदात सिकंदरने झोळी डाव घेत शिवराजला उचलून खाली घेतले आणि त्याच स्थितीत शिवराजला चितपट केले. विजेत्या सिकंदरला थार गाडी, गदा असे पारितोषिक देण्यात आले. उपविजेता शिवराज ट्रॅक्टरचा मानकरी ठरला.
