पुणे- महाराष्ट्र राज्यात वीज ऊद्योगात रिक्त पदांवर सातत्याने व नियमीतपणे कंत्राटी कामगार कार्यरत आहेत. येथील कंत्राटदार एजन्सी फक्त नामधारी असुन फक्त वेतन वाटपाचे काम करीत आहे, असे असताना ही मोठ्या प्रमाणात आर्थिक शोषण, बेकायदेशीर बाबी कंत्राटदार कडून केल्या जातात, पोर्टल मध्ये नावे असतानाही आवश्यक ती कागदपत्रे जमा करूनही वेगवेगळ्या नावाखाली पैशाची मागणी केली जाते, पगार वेळेवर मिळत नाही, कामगार खात्याकडे मुख्य नियोक्ता व कंत्राटदार यांच्या तपासणी बाबतीत तक्रारी दाखल करूनही कारवाई होत नाही.
या मुळे वीज ऊद्योगातील कंत्राटदार हटवून हरियाणा राज्यातील पध्दतीने कामगारांना न्याय द्यावा अशी मागणी कामगार ऊपायुक्त कार्यालय पुणे येथे झालेल्या मिटींग मध्ये सचिव निखिल टेकवडे यांनी केली.
राज्याचे उपमुख्यमंत्री तथा ऊर्जामंत्री मा.देवेंद्रजी फडणवीस यांनी वीज कंत्राटी कामगारांना दिलेल्या आश्वासनाची पूर्तता प्रशासनाने करावी, महाराष्ट्रात देखील हरियाना सरकार प्रमाणे कंत्राटदार मुक्त जॉब सिक्युरिटी द्यावी, वेतनात वाढ करावी, वीज कंपनीच्या होऊ घातलेल्या भरती मध्ये वयात वाढ, आरक्षण व मार्क द्यावेत इत्यादि मागण्या करिता “*सरकार जगाओ” आंदोलनाच्या तिसरा टप्यात आज महाराष्ट्र वीज कंत्राटी कामगार संघा (संलग्न भारतीय मजदूर संघ) तर्फे मा.अप्पर कामगार आयुक्त पुणे विभाग श्री शैलेंद्र पोळ, मा कामगार उपायुक्त पुणे श्री अभय गीते यांना महाराष्ट्र विज कंत्राटी कामगार संघ (संल्लग भारतीय मजदूर संघ) सरचिटणीस सचिन मेंगाळे पुणे झोन सचिव निखिल टेकवडे, अविनाश जगताप महेश वाघमारे ,चंद्रकांत नागरगोजे , वैभव कामठे तुकाराम वाल्हेकर,गणेश कपले , सुनील गिरासे या शिष्टमंडळाने निवेदन देण्यात आले.
राज्यभर कंत्राटी कामगारांचे कंत्राटदारांच्या मार्फत होत असलेले आर्थिक शोषण व त्यास अधिकाऱ्यांचे अभय व संगनमत असल्याने कष्टकरी कामगाराला पूर्ण वेतन मिळत नाही, बोनस नाही, पेमेंट स्लीप नाही, डोक्यावर सतत रोजगाराची टांगती तलवार, जीव कधी जाईल सांगता येत नाही अपघात झाल्यास विमा नाही या बिकट अवस्थेत कामगार वर्षानुवर्षे सेवा देत आहे.
तसेच विविध ऊद्योगातील किमान वेतन सुधारणा बाबतीत ही प्रलंबित वाढ फरका सहित देण्यात यावी व राज्यातील विविध ऊद्योगातील कंत्राटी कामगारांना न्याय द्यावा ही मागणी केली आहे.
यांच्या वेतनात वाढ करून हरियाणा सरकार प्रमाणे नामधारी बोगस कंत्राटदारांना बाजूला सारून उपकंपनी तर्फे थेट कामगारांच्या बँक खात्यात वेतन देऊ असे आश्वासन डिसेंबर 2023 नागपूर अधिवेशनात ऊर्जामंत्री फडणवीसांनी देऊन सुद्धा त्याची पूर्तता न झाल्याने कामगार वर्गात तीव्र नाराजी आहे.
कंत्राटदार तुपाशी व कामगार उपाशी अशी वेळ आल्याने तिन्ही वीज कंपनीतील वीज कंत्राटी कामगार अन्यायाला वाचा फोडुन सरकारला जागे करण्यासाठी भारतीय मजदूर संघाच्या महाराष्ट्र वीज कंत्राटी कामगार संघाकडून विधानसभा अधिवेशना दरम्यान 9 जुलै रोजी मुंबईतील आझाद मैदानावर सरकार जगाओ आंदोलन करणार आहे. आज विविध जिल्ह्यातील मा. कामगार कार्यालय यांना निवेदन देण्यात आले आहे .
अवर प्रधान सचिव ऊर्जा व कामगार यांनी मीटिंग घेऊन तोडगा काढावा ऊर्जामंत्री यांनी दिलेले आश्वासन पाळावे अशी अपेक्षा महाराष्ट्र विज कंत्राटी कामगार संघांचे अध्यक्ष निलेश खरात, महामंत्री सचिन मेंगाळे यांनी व्यक्त केली.
