बिबट्या प्रवण क्षेत्रात पालकांनी मुलांना एकटे सोडू नका – गटशिक्षण अधिकारी अरविंद कुमावत

अकोले प्रतिनिधी

आपल्या परिसरात बिबट्यांचा वावर आढळून येत असून शिक्षकांनी यासाठी विशेष खबरदारी घेत विद्यार्थ्यांना कोणती काळजी घ्यावी याबाबत मार्गदर्शन करत पालकांमध्ये जाणीव जागृती करावी असे आवाहन अकोल्याचे गटशिक्षण अधिकारी अरविंद कुमावत यांनी केले.

श्री. कुमावत कोतूळ येथे शिक्षण परिषदेत जांभळेवाडी, केळी ओतूर, कोतूळ केंद्रातील शिक्षकांना मार्गदर्शन करताना बोलत होते. यावेळी जांभळेवाडीचे केंद्रप्रमुख जनार्दन भवरे, कोतूळचे केंद्रप्रमुख गायकवाड यांच्यासह शिक्षत उपस्थित होते.
श्री. कुमावत म्हणाले, अलीकडील काळात मानवी वस्त्यांमध्ये बिबट्याचा वावर वाढल्याच्या घटना सातत्याने समोर येत आहेत. या पार्श्वभूमीवर, वन विभागाने नागरिकांच्या सुरक्षिततेसाठी एक विशेष मार्गदर्शक तत्त्वे (Guidelines) जारी केली आहेत. बिबट्याशी अचानक सामना झाल्यास किंवा त्याच्या संभाव्य हल्ल्यापासून बचाव करण्यासाठी कोणत्या उपाययोजना कराव्यात, याची सविस्तर माहिती या नियमावलीत देण्यात आली आहे.

सायंकाळी ६ ते सकाळी ६ वाजेपर्यंत घराबाहेर एकट्याने फिरणे पूर्णपणे टाळावे. मुलांना एकटे सोडू नका. आवश्यक असल्यास, चार किंवा अधिक व्यक्तींच्या समूहाने मोठ्या आवाजात बोलत प्रवास करावा. यामुळे बिबट्याला मानवी उपस्थितीची जाणीव होते. बिबट्या अंधारात शिकार करत असल्याने, घराच्या आणि परिसराच्या सभोवताली पुरेसा प्रकाश ठेवावा. कुत्रे, मांजर किंवा जनावरे रात्रीच्या वेळी उघड्यावर ठेवू नयेत. त्यांना सुरक्षित आणि बंदिस्त गोठ्यात ठेवा. पाळीव प्राणी बिबट्यांसाठी सहज लक्ष्य ठरतात. गोठ्यांच्या भिंती उंच आणि मजबूत असाव्यात. रात्री दारे व खिडक्या व्यवस्थित बंद आहेत याची खात्री करा.
जर बिबट्या अचानक समोर आला किंवा जवळ आला, तर घाबरून न जाता खालील उपाय त्वरित करावेत. बिबट्याला पाठ दाखवून पळू नका. पळाल्यास तो तुम्हाला शिकार मानू शकतो. दोन्ही हात वर करा, जॅकेट उघडा किंवा कोणतीही वस्तू वापरा ज्यामुळे तुम्ही जास्त मोठे दिसाल. त्वरित मोठ्याने ओरडा, शिट्टी वाजवा किंवा काठीने आवाज करून बिबट्याला घाबरवा. बिबट्याच्या डोळ्यात थेट पाहा. यामुळे बिबट्याला तुम्ही सावध आहात, असा संदेश मिळतो.बिबट्यांपासून काळजी घेणे हाच मोठा बचाव असल्याचेही श्री. कुमावत यांनी यावेळी सांगितले.