पुणे : भारतीय मजदूर संघ, पुणे जिल्हा यांच्या वतीने जागतिक महिला दिन निमित्त दिनांक १० मार्च २०२६ रोजी विशेष कार्यक्रमाचे आयोजन करण्यात 185 शनिवार पेठ येथील विश्वकर्मा भवन पुणे येथे करण्यात आले होते .
सध्या संघटित व असंघटित क्षेत्रातील कामगारांच्या समस्या अत्यंत आव्हानात्मक स्वरूपाच्या आहेत. विशेषतः असंघटित क्षेत्रात अंगणवाडी सेविका, घरेलू कामगार, बांधकाम कामगार, हॉस्पिटल कर्मचारी, बीडी कामगार, सेवा क्षेत्रातील कामगार, प्लॅटफॉर्म वर्कर्स, मेट्रो रेल कॉर्पोरेशन, वीज क्षेत्र, बँक उद्योग, महानगरपालिका, संरक्षण तसेच IT क्षेत्रात मोठ्या प्रमाणात महिला कामगार कार्यरत आहेत.
या पार्श्वभूमीवर संघटित व असंघटित क्षेत्रातील महिला कामगारांनी आपल्या न्याय्य हक्कांसाठी संघटित होऊन संघर्ष करणे आवश्यक आहे यासाठीच संघटनेची ताकद बनावे आणि संघटनेच्या कामात आपला सहभाग वाढवावा. त्यासाठी वेळेचे योग्य नियोजन करावे असे आवाहन प्रमुख वक्त्या तारका शाळीग्राम यांनी केले.
कामगार क्षेत्रात कार्यरत असलेल्या महिलांच्या योगदानाचा गौरव करणे, तसेच त्यांच्या हक्क, सक्षमीकरण आणि सामाजिक सहभागाबाबत जागरूकता निर्माण करणे गरजेचे आहे. महिलांनी समान काम समान वेतन हा आपला हक्क आहे , महिला सध्या सर्व ठिकाणी कंत्राटी पध्दती वर काम करत आहेत न्याय्य वेतन करिता संघर्ष करणे आवश्यक आहे . कार्याच्या ठिकाणी कोणताही भेदभाव, अन्याय सहन करता कामा नये याची महिलांच्यात जागृती निर्माण करणं हा या कार्यक्रमाचा मुख्य उद्देश आहे. अशा स्वरूपाचे कार्यक्रम राज्यातील विविध जिल्ह्यांमधे आयोजित करण्यात येत आहेत. तसेच असंघटित महिला कामगारांची परिस्थिती, महिलांच्या समस्या याची विस्तृत माहिती कार्यक्रमाच्या अध्यक्षा श्रीमती शिल्पा देशपांडे यांनी दिली व या मागण्यांबाबत जिल्हाधिकारी यांना निवेदन देण्यात येणार असल्याचेही त्यांनी सांगितले.
तसेच वंदना कामठे (प्रदेश उपाध्यक्ष, भारतीय मजदूर संघ) यांनी महिलांच्या संघटनात्मक सक्षमीकरणाबाबत विशेष मार्गदर्शन केले. या कार्यक्रमाचे सूत्रसंचालन बॅक ऑफिसर्स ऑर्गनायझेशन चे अखिल भारतीय अध्यक्ष तृप्ती आळती यांनी प्रास्ताविक व आभार प्रदर्शन पुणे मेट्रो रेल कामगार संघ पदाधिकारी रेखा फडके यांनी केले .
या कार्यक्रमात भारतीय मजदूर संघ महाराष्ट्र प्रदेश संघटन मंत्री, बाळासाहेब भुजबळ, अखिल भारतीय ठेका मजदूर महासंघ सरचिटणीस सचिन मेंगाळे , सुरक्षा रक्षक महासंघ सेक्रटरी, अनिल पारधी, बांधकाम कामगार संघ राहुल बोडके, पुणे मेट्रो रेल कामगार संघ अध्यक्ष राम सुरवसे , बिडी महासंघ उमेश विश्वाद, पुणे जिल्ह्यातील विविध उद्योग, सेवा क्षेत्र, संरक्षण, मेट्रो, बीडी उद्योग, बँक क्षेत्र , सुरक्षारक्षक, वीज कामगार, वीज क्षेत्रातील कंत्राटी कामगार , तसेच असंघटित क्षेत्रात कार्यरत असलेल्या महिला कामगार व कार्यकर्त्या मोठ्या संख्येने उपस्थित होत्या.
महिला सशक्तीकरण, कामगार हक्कांची जाणीव आणि संघटनात्मक एकजूट वाढविण्यासाठी हा कार्यक्रम महत्त्वपूर्ण ठरला आहे, असे मनोगत अर्जुन चव्हाण (अध्यक्ष, पुणे जिल्हा) व सागर पवार (सचिव ) यांनी व्यक्त केले
