विद्यार्थ्यांना मिळते अनुभवाधारित शिक्षण
संजय उकिरडे /प्रतिनिधी
रयत शिक्षण संस्थेच्या शैक्षणिक वाटचालीत आधुनिक तंत्रज्ञानाचा प्रभावी वापर करण्याच्या दृष्टीने शैक्षणिक वर्ष २०२५-२६ पासून इंटरॅक्टिव्ह पॅनलच्या माध्यमातून अध्यापनाला विशेष महत्त्व देण्यात येत आहे.
संस्थेचे अध्यक्ष मा. शरदचंद्रजी पवार तसेच चेअरमन मा. चंद्रकांतजी दळवी यांच्या मार्गदर्शनाखाली विद्यार्थ्यांना आधुनिक व गुणवत्तापूर्ण शिक्षण देण्यासाठी हा उपक्रम राबविण्यात येत आहे.
इंटरॅक्टिव्ह पॅनलच्या माध्यमातून विविध विषयांचे अध्यापन अधिक दृश्य, मनोरंजक, कृतीशील व विद्यार्थीकेंद्रित होत आहे. पाठ्यपुस्तकातील संकल्पना चित्रे, नकाशे, व्हिडिओ, अॅनिमेशन, डिजिटल साहित्य व विविध शैक्षणिक साधनांच्या माध्यमातून विद्यार्थ्यांसमोर मांडता येत असल्याने त्यांच्या आकलनात अधिक सुलभता निर्माण होत आहे.
विज्ञान, गणित, भूगोल, इतिहास, भाषा आदी विषयांतील अवघड संकल्पना प्रत्यक्ष दृश्यांच्या माध्यमातून समजावून सांगता येत असल्याने विद्यार्थ्यांची जिज्ञासा, एकाग्रता आणि विषयातील रुची वाढत आहे. विद्यार्थ्यांनाही पॅनलवरील उपक्रमांमध्ये सक्रिय सहभाग घेता येत असल्याने वर्गातील अध्यापन अधिक संवादात्मक बनले आहे.
इंटरॅक्टिव्ह पॅनलच्या वापरामुळे शिक्षकांनाही अध्यापनासाठी विविध डिजिटल साधनांचा वापर करण्याची संधी मिळत असून, पारंपरिक अध्यापनाला आधुनिक तंत्रज्ञानाची जोड मिळाली आहे.
“तंत्रज्ञान हे शिक्षकाला पर्याय नसून शिक्षकाच्या हातातील प्रभावी शैक्षणिक साधन आहे,” या भूमिकेतून त्याचा योग्य वापर केल्यास विद्यार्थ्यांच्या शिकण्याच्या गुणवत्तेत निश्चितच सकारात्मक बदल घडून येतो.
रयत शिक्षण संस्थेच्या या तंत्रज्ञानाधारित उपक्रमामुळे विद्यार्थ्यांना आधुनिक काळाशी सुसंगत शिक्षण मिळत असून, डिजिटल वर्गखोली ही विद्यार्थ्यांसाठी ज्ञान, अनुभव आणि नव्या संधींची पर्वणी ठरत आहे.
