संजय साबळे
संगमनेर प्रतिनिधी :
ट्रॅक्टरला जोडलेल्या रोटाव्हेटर मध्ये गुंतलेला चिखल काढत असताना तरुण शेतकऱ्याचा रोटाव्हेटर खाली दबून दुर्दैवी मृत्यू झाल्याची घटना संगमनेर तालुक्यातील ओझर खुर्द शिवारात काल दुपारी घडली. पुंजा धोंडीबा शिंदे असे या दुर्घटनेत मृत्यू झालेल्या तरुण शेतकऱ्याचे नाव आहे.
ओझर खुर्द – रहिमपूर रस्त्याच्या कडेला असणाऱ्या ओझर खुर्द शिवारात दत्त मंदिरा शेजारील आपल्या स्वतःच्या शेतीत पुंजा धोंडीबा शिंदे (वय ३९) हे आपल्या ट्रॅक्टरने काल सोमवारी दुपारी साडेतीन वाजेच्या सुमारास ट्रॅक्टरच्या सहाय्याने रोटाव्हेटर मारत होते. यावेळी रोटाव्हेटर मध्ये चिखल गुंतल्याने शिंदे यांनी ट्रॅक्टर उताराला लावून ते रोट्याव्हेटरचा चिखल काढत होते. त्यावेळी अचानक ट्रॅक्टर पुढे सरकल्याने रोटाव्हेटर थेट पुंजा शिंदे यांच्या छाती आणि पोटावर पडला. ही घटना तेथे उपस्थित असणाऱ्या स्थानिक लोकांनी पाहिल्यावर त्यांनी त्या ठिकाणी धाव घेतली व रोटाव्हेटर खाली दबलेल्या पुंजा शिंदे यांना संगमनेर येथील खाजगी रुग्णालयात उपचारासाठी दाखल केले. मात्र उपचारापूर्वीच त्यांचा मृत्यू झाल्याचे डॉक्टरांनी सांगितले. पुंजा शिंदे यांच्यावर काल रात्री उशिरा ओझर खुर्द येथे शोकाकुल वातावरणात अंत्यसंस्कार करण्यात आले. त्यांच्या पक्षात पत्नी, दोन मुली, एक मुलगा, आई, भाऊ, बहीण असा मोठा परिवार आहे. त्यांच्या अपघाती मृत्यूने ओझर खुर्द आणि परिसरात हळहळ व्यक्त करण्यात येत आहे.
