शहाराम आगळे
शेवगाव तालुका प्रतिनिधी
मराठा आरक्षण मुद्यासाठी मराठयांचा संघर्षयौध्दा मनोज जरांगे पाटील यांची सभा गुरुवार ता.२३ रोजी साई लाँन्स पाथर्डी रोड,शेवगाव येथे दुपारी १ वाजता होणार आहे.
या सभेची तयारी सुरू असून लाखभरांपेक्षा अधिक मराठा बांधव उपस्थित राहतील. अशी माहिती सकल मराठा नियोजन समितीच्या वतीने देण्यात आली आहे.
मनोज जरांगे पाटील यांनी मराठा समाजाला आरक्षण मिळावे यासाठी समाजामध्ये जनजागृती करण्यासाठी राज्यभर तिसऱ्या टप्प्यातील दौऱ्याला सुरुवात केली आहे.राज्यात त्यांच्या विविध ठिकाणी सभा सुरू आहेत. शेवगाव शहरात जरांगे पाटील प्रथमच येत असून ही सभा नियोजनबध्द व्हावी यासाठी मराठा समाज समितीचे पदाधिकारी सरसावले आहेत.
नेवासा येथे गुरुवार ता.२३ रोजी सकाळी जरांगे यांची सभा होणार आहे. सभा संपल्यानंतर नेवासा – शेवगाव राज्यमार्गावर ठिकठिकाणी जरांगे यांचे स्वागत करण्यात येणार आहे.त्यानंतर शेवगाव येथे दुपारी १ वाजता साई लाँन्स पाथर्डी रोड,शेवगाव येथे सभेचे आयोजन करण्यात येणार आहे.
महिला व वृध्दांना स्वतंत्र बैठक व्यवस्था करण्यात आली आहे.सभेस्थळी पाणी व वैद्यकीय व्यवस्था करण्यात आलेली आहे. या सभेसाठी तालुक्यासह जिल्हयातील मराठा समाजाच्या नागरीकांनी उपस्थित रहावे. असे आवाहन नियोजन समितीच्या वतीने करण्यात आले आहे.
