रोटरी क्लब ऑफ नाशिकच्या अध्यक्षपदी शिल्पा पारख; कार्यकारिणीत प्रथमच १५ महिलांना स्थान;
कुंभमेळ्यात रोटरीला सोबत घेऊन काम करू – विभागीय आयुक्त डॉ. गेडाम
नाशिक : रोटरी क्लब ऑफ नाशिकच्या अध्यक्षपदी शिल्पा पारख, सचिवपदी ऋषिकेश संम्मनवार आणि सहसचिवपदी हेमराज राजपूत यांची निवड झाली. त्यांचा पदग्रहण सोहळा रविवारी ‘दि गेटवे हॉटेल’ येथे मोठ्या उत्साहात पार पडला.
शानदार पदग्रहण समारंभास प्रमुख पाहुणे म्हणून विभागीय आयुक्त डॉ. प्रवीण गेडाम, रोटरीचे प्रांतपाल डॉ. राजेश पाटील यांच्या प्रमुख उपस्थितीत पार पडला. यावेळी रोटरी क्लब ऑफ नाशिकचे मावळते अध्यक्ष डॉ. गौरव सामनेरकर यांनी अध्यक्षपदाची सूत्रे शिल्पा पारख यांना तर सीए रेखा पटवर्धन यांनी सचिवपदाची सूत्रे ऋषिकेश संम्मनवार यांच्याकडे सुपूर्द केली. यावेळी नवनिर्वाचित संचालकांचाही शपथविधी पार पडला.
– यावेळी बोलताना डॉ. प्रवीण गेडाम म्हणाले, गेल्या ८१ वर्षांची परंपरा लाभलेल्या रोटरी क्लब ऑफ नाशिकचे कार्य कौतुकास्पद आहे. सामाजिक कार्यात मोलाचे योगदान देणाऱ्या नाशिक रोटरीचे काम वाखाणण्याजोगे आहे. ही संस्था राबवित असलेले उपक्रम पाहून मनस्वी आनंद वाटतो. आगामी कुंभमेळ्याच्या पार्श्वभूमीवर शासनासोबत रोटरी संस्थेनेही आपले सामाजिक योगदान द्यावे. रोटरीच्या सामाजिक उपक्रमांत आपणही चांगले सहकार्य करणार असल्याचे त्यांनी स्पष्ट केले.
प्रांतपाल डॉ. राजेश पाटील यांनीही रोटरी क्लब ऑफ नाशिकच्या विविध प्रकल्पांचा व राबवीत असलेल्या विविध योजनांचा उल्लेख करून रोटरीच्या कार्याचे कौतुक केले. संपूर्ण राज्यात या क्लबचे कार्य कौतुकास्पद असून आगामी वर्षात अनेक सामाजिक उपक्रम राबविण्यात येतील अशी अशा त्यांनी यावेळी व्यक्त केली. ‘रोटरीनामा’च्या अंकाचे प्रकाशनही यावेळी करण्यात आले.
माजी अध्यक्ष डॉ. गौरव सामनेरकर यांनी गतवर्षात केलेल्या उपक्रमांच्या सामाजिक कार्याचा अहवाल चित्रफितीद्वारे सादर केला. प्रारंभी विस्डम शाळेच्या मुलांनी सांस्कृतिक कार्यक्रमाचे सादरीकरण केले. कार्यक्रमाचे सूत्रसंचालन सोनाली चिंधडे, डॉ. नेहा मेहेर आणि वृषाली ब्राह्मणकर यांनी केले. सचिव ऋषिकेश सम्मनवार यांनी उपस्थितांचे आभार मानले. कार्यक्रमास माजी प्रांतपाल नाना शेवाळे, आशा वेणूगोपाल, रमेश मेहेर, राजीव शर्मा, मनीष चंद्रा, उदयराज पटवर्धन यांच्यासह ओमप्रकाश रावत, मंगेश अपशंकर, अनिल सुकेनकर, विजय दिनानी, शशिकांत पारख, कमलाकर टाक, मकरंद चिंधडे, श्रिया कुलकर्णी आदी मोठ्या संख्येने उपस्थित होते.
