अकोले विधानसभा मतदारसंघात ३०७ मतदान केद्र ,१५३५ कर्मचारी तर ०२ लाख ६६ लाख १२९ मतदार!

सकाळी ७ ते सायंकाळी ६ पर्यंत मतदान,

अकोले, दि. १९ :-

भारत निवडणूक आयोगाने घोषित केलेल्या निवडणूक कार्यक्रमानुसार अकोले विधानसभा मतदारसंघात बुधवारी, (दि. २० नोव्हेंबर) रोजी सकाळी ७ ते सायंकाळी ६ वाजेपर्यंत मतदान होणार आहे. ३०७ केंद्रांवर होणाऱ्या या मतदान प्रक्रियेसाठी मतदान पथके पोलीस बंदोबस्तात रवाना झाली. मतदान केंद्रावर नियुक्त मतदान पथकांशी निवडणूक निर्णय अधिकारी अनुपसिंह यादव यांनी संवाद साधून त्यांना शुभेच्छा दिल्या. तसेच मनावर कोणतेही दडपण न घेता आपल्यावर सोपविलेली जबाबदारी प्रामाणिकपणे पार पाडावी, अशा सूचना केल्या निवडणूक निर्णय अधिकाऱ्यांनी स्वतः संवाद साधल्याने आपल्या मनावरील दडपण कमी झाले असून आता अधिक उत्साहाने मतदान कर्तव्य पार पाडणार असल्याचे यावेळी उपस्थित अधिकारी, कर्मचारी यांनी सांगितले.

अकोले विधानसभा मतदारसंघात ३०७ मतदान केंद्रावर १५३५ अधिकारी – कर्मचाऱ्यांचे मतदान पथकांना अकोले तालुका तहसील कार्यालय येथे उभारण्यात आलेल्या १५ टेबलच्या माध्यमातून बॅलेट युनिट, कंट्रोल युनिट व ईव्हीएमसह मतदान साहित्याचे वाटप करण्यात आले. ३२ बसेस, ११ जीप, २२ स्कूल बस मधून मतदान पथके मतदान केंद्रावर रवाना झाले. याप्रसंगी सहायक निवडणूक निर्णय अधिकारी डॉ. सिद्धार्थ मोरे, गट विकास अधिकारी विकास चौरे, निवासी नायब तहसीलदार श्री. किसन लोहारे, महसूल नायब तहसीलदार श्री. प्रमोद सावंत, निवडणूक नायब तहसीलदार दत्तू वाघ, नायब तहसीलदार मार्तंड माळवे, पुरवठा निरीक्षण अधिकारी संदीप निळे आदी उपस्थित होते.

अकोले लोकसभा मतदारसंघात ९ उमेदवार निवडणूक लढवीत असून एकूण ०२ लाख ६६ हजार १२९ इतके मतदार आहेत. यात १ लाख ३८ हजार ८४५ पुरूष मतदार आहेत. १ लाख २७ हजार २८३ स्त्री मतदार आहेत. तृतीयपंथीय १ मतदार आहेत. सेनादलातील ५३० मतदार आहेत. मतदानादिवशी पहाटे साडेपाच वाजता सर्व उमेदवारांनी नियुक्त केलेल्या प्रतिनिधींच्या उपस्थितीत मॉक पोलची प्रक्रिया पार पडणार आहे. त्यानंतर सकाळी ७ वाजता प्रत्यक्ष मतदानाला सुरुवात होईल.
मतदान प्रक्रियेत मतदारांना सहकार्य व्हावे म्हणून प्रत्येक मतदान केंद्रावर बीएलओची नियुक्त्या करण्यात आल्या आहेत. प्रत्येक मतदान केंद्रावर दिव्यांगांसाठी व्हिलचेअरची सुविधा असणार आहे. वेटींग रुम, पिण्याच्या पाण्याची सुविधा, विद्युत पुरवठा अदि सुविधा उपलब्ध करुन देण्यात आल्या आहेत. एनएसएस व एनसीसीचे १८ वयापेक्षा कमी वयाच्या स्वयंसेवकांची नेमणूका करण्यात आल्या आहेत.
सुमारे ५९१ सुरक्षा कर्मचाऱ्यांची नियुक्ती

मतदान केंद्रांवरील सुरक्षाकामी सुमारे ३०४ पोलीस कर्मचारी व २८७ गृह रक्षक दलाच्या कर्मचाऱ्यांची सुरक्षा व्यवस्थेकामी नियुक्ती करण्यात आली आहे. अकोले विधानसभेतील प्रत्येक बुथवर गरजेनुसार २ सुरक्षा कर्मचाऱ्यांची नियुक्ती केली जाणार आहे. ११ पथकांच्या माध्यमांतून पेट्रोलिंग केली जाणार आहे.
मतदान केंद्रांच्या हालचालींवर बारीक लक्ष
अकोले विधानसभेतील ३०७ मतदान केंद्रांपैकी ५० टक्के मतदान केंद्राचे लाईव्ह वेबकॉस्टींग करण्यात येणार आहे. निवडणूक निर्णय अधिकारी कार्यालयातील पडद्यावर (स्क्रीनवर) ही लाईव्ह कॉस्टींगच्या माध्यमातून मतदानाच्या दिवशी २० नोव्हेंबर रोजी २०२४ रोजी सकाळी ५.३० वाजेपासून राखीव कर्मचाऱ्यांची टीम क्षणा – क्षणाला मतदान केंद्रावरील हालाचालींवर बारीक लक्ष ठेवणार आहेत.
मतदारांनी मतदान केंद्रामध्ये भ्रमणध्वनी घेऊन जावू नये. मतदारांनी कोणत्याही प्रलोभनाला बळी न पडता येत्या २० नोव्हेंबर रोजी आपला मताचा पवित्र हक्क बजावून लोकशाहीच्या सक्षमीकरणात योगदान द्यावे, असे आवाहनही श्री. यादव यांनी केले आहे.