पनवेल|कळंबोली प्रतिनिधी/श्रीनाथ लाड:
पावसाळा अवघ्या काही दिवसांवर येऊन ठेपल्याने पनवेल महानगरपालिकेने मान्सूनपूर्व कामांना वेग दिला आहे. नागरिकांना पावसाळ्यात कोणत्याही प्रकारच्या पूरस्थितीला सामोरे जावे लागू नये, यासाठी पनवेल महापालिकेचे महापौर नितीन पाटील यांनी कळंबोली शहरातील विविध भागांत जाऊन नाल्यांच्या सफाईची प्रत्यक्ष पाहणी केली आणि परिस्थितीचा सविस्तर आढावा घेतला.
“पावसाळ्यात शहरात पाणी साचू नये म्हणून नाल्यांची योग्य स्वच्छता आणि पाण्याचा सुरळीत निचरा होणे अत्यंत आवश्यक आहे,” असे प्रतिपादन यावेळी महापौर नितीन पाटील यांनी केले. तसेच त्यांनी संबंधित विभागाच्या अधिकाऱ्यांना कामात हलगर्जीपणा न करता, तातडीने आवश्यक उपाययोजना करण्याच्या कडक सूचना दिल्या. नागरिकांच्या सुरक्षिततेला सर्वोच्च प्राधान्य देऊन सर्व मान्सूनपूर्व कामे वेळेत पूर्ण करण्याचे निर्देशही त्यांनी प्रशासनाला दिले.
या पाहणी दौऱ्यादरम्यान उपमहापौर प्रमिला पाटील, स्थायी समिती सभापती बाबन मुकादम आणि सभागृह नेते प्रकाश बिनेदार यांनी नालेसफाईच्या कामाची बारकाईने पाहणी केली. यासोबतच नगरसेवक रविंद्र भगत, विजय खानावकर, नगरसेविका मोनिका महानवर, सरस्वती काथारा, रायगड जिल्हा चिटणीस रविशेठ पाटील, रामदास महानवर, केशव यादव यांच्यासह परिसरातील अनेक नागरिक मोठ्या संख्येने उपस्थित होते. महापौरांच्या या दौऱ्यामुळे शहरातील नालेसफाईच्या कामाला आता अधिक गती मिळण्याची चिन्हे आहेत.
