:
राजूर प्रतिनिधी
निसर्गाच्या सानिध्यात वसलेल्या राजूर नगरीत श्रद्धेचा जनसागर उसळला होता. निमित्त होते, महर्षी वाल्मिक ऋषी विश्वस्त मंडळ व नवाळी समाज यांच्या वतीने आयोजित करण्यात आलेल्या पारंपरिक ‘देवकाठी’ यात्रोत्सवाचे. पिढ्यानपिढ्या चालत आलेला हा वारसा आजही तितक्याच निष्ठेने जपणाऱ्या नवाळी समाजाने या उत्सवातून समाजहित आणि एकात्मतेचे दर्शन घडवले.
भक्तीची पाऊले आणि परंपरेचा वारसा हा केवळ एक उत्सव नसून ती एक अखंड चालत आलेली साधना आहे. राजूर ते रंधाफॉल या मार्गावर निघालेल्या या ‘देवकाठी’ दिंडीत ५ वर्षांच्या बालकांपासून ते ७० वर्षांच्या वृद्धांपर्यंत सर्वजण सहभागी झाले होते. कडाक्याचे ऊन किंवा प्रवासाचा थकवा यांच्यावर श्रद्धेने मात करत, ‘भंडारा’ उधळत निघालेली ही दिंडी पाहताना भक्तीचे एक अनोखे चैतन्य अनुभवायला मिळाले.
उत्सवाचे वैशिष्ट्य आणि सामाजिक बांधिलकी गेल्या आठ वर्षांपासून या यात्रोत्सवाला समाजकारणाची जोड देण्यात आली आहे. देवकाठी स्थानापन्न झाल्यावर होणारी महाआरती आणि त्यानंतर सातशे ते आठशे भाविकांनी घेतलेला महाप्रसादाचा लाभ, हे नवाळी समाजाच्या दातृत्वाचे प्रतीक ठरले.
राजूर-केळुंगण-माळेगाव-कातळापूर मार्गे रंधाफॉल येथील घोरपडा देवीच्या चरणी नतमस्तक होण्यासाठी निघालेली ही दिंडी शिस्त आणि उत्साहाचा आदर्श घालून देते.
”परंपरा ही केवळ जपण्यासाठी नसते, तर ती पुढच्या पिढीला संस्कार म्हणून देण्यासाठी असते. नवाळी समाजाने जपलेली ही देवकाठीची परंपरा आजच्या काळात समाज बांधिलकीचे उत्तम उदाहरण आहे.”
नवाळी परिवाराचा वतीने विविध सरकारी पदावर असलेल्या अधिकारी यांचा गुणगौरव करण्यात आला.
या उत्सवात केवळ नवाळी परिवारच नाही, तर संपूर्ण पंचक्रोशीतील समाजबांधव मोठ्या संख्येने सहभागी झाले होते. जात-पात आणि भेदभावा पलीकडे जाऊन श्रद्धेच्या एका धाग्यात सर्वजण गुंफले गेले होते. पूर्वजांनी दिलेला हा वारसा भविष्यातही असाच तेवत ठेवण्याचा संकल्प यावेळी प्रत्येक भाविकाच्या डोळ्यात दिसत होता.
