आदिवासी होतकरू विद्यार्थ्यांसाठी मोफत प्रशिक्षण केंद्रातून नवचैतन्याचा संचार
अकोले, प्रतिनिधी
अकोले तालुका एज्युकेशन सोसायटीचे अगस्ती कला, वाणिज्य व दादासाहेब रूपवते विज्ञान महाविद्यालय, अकोले येथे आयोजित दोन दिवसीय अगस्ती डिफेन्स अकॅडमी व पोलीस भरतीपूर्व मोफत प्रशिक्षण केंद्राच्या उद्घाटन संपन्न झाला
आदिवासी व ग्रामीण भागातील होतकरू विद्यार्थ्यांसाठी हा कार्यक्रम खऱ्या अर्थाने भव्य, दिव्य आणि प्रेरणादायी उत्सव ठरला.
पहिल्या दिवसाच्या उद्घाटन सोहळ्यात सायबर सुरक्षेवर प्रेरक मार्गदर्शन पोलीस उपनिरीक्षक मा. संदीप हजारे (पोलीस स्टेशन, अकोले) यांनी विद्यार्थ्यांना दिले.
कार्यक्रमाचे अध्यक्षस्थान अकोले तालुका एज्युकेशन सोसायटीचे कायम विश्वस्त गिरजाजी जाधव यांनी भूषविले.
प्रमुख पाहुणे म्हणून पोलीस उपनिरीक्षक संदीप हजारे यांनी सायबर सेक्युरिटी या अत्यंत महत्त्वाच्या विषयावर विद्यार्थ्यांना मार्मिक आणि वास्तवदर्शी मार्गदर्शन केले.
या प्रसंगी संस्थेचे अध्यक्ष सुनील दातीर, स्वीकृत विश्वस्त एम. डी. सोनवणे, महाविद्यालयाचे प्राचार्य डॉ. भास्कर शेळके, कनिष्ठ महाविद्यालयाचे उपप्राचार्य श्री. चांगदेव डोंगरे, तसेच उपप्राचार्य अशोक दातीर हे मान्यवर उपस्थित होते.
कै मधुकरराव पिचड किरणा धान्य-दान व संकल्प योजना या उपक्रमांतर्गत गरजू विद्यार्थ्यांसाठी ७५ तांदळाचे कट्टे व २० तेलाचे डबे अशा स्वरूपात मदत महेश पाडेकर व मुख्याध्यापक विलास सावंत यांच्या माध्यमातून कार्यक्रमात देण्यात आली.
अकॅडमीतील ५० विद्यार्थी व ५० विद्यार्थिनींना ओम साई कन्स्ट्रक्शनचे संचालक मिलिंद नाईकवाडी व साई दर्शनचे मालक विशाल कोटकर यांच्या हस्ते टी-शर्टचे मोफत वितरण करण्यात आले.
जिल्हा पोलीस अधीक्षक सोमनाथ घार्गे यांनी
महाविद्यालय परिसरात असलेल्या २६/११ शहीद स्मारकाला पुष्पचक्र अर्पण करून शहीद जवानांना अभिवादन व मानवंदना दिली. घार्गे साहेबांनी विद्यार्थ्यांशी थेट संवाद साधला.
त्यांच्या सोबत पोलीस उपअधीक्षक कुणाल सोनवणे, पोलीस निरीक्षक मोहन बोरसे उपस्थित होते.
आपल्या प्रभावी, प्रखर आणि प्रेरणादायी मार्गदर्शनात घार्गे साहेब म्हणाले –
> “यश मिळवायचं असेल तर प्रामाणिकपणा, शिस्त आणि आत्मविश्वास या तीन गोष्टींचं बळ अंगीकारा. प्रत्येक अडचण ही संधी म्हणून स्वीकारा.”
त्यांनी विद्यार्थ्यांना पोलीस, लष्कर आणि वनसंरक्षक भरतीसाठी मानसिक, शारीरिक व शैक्षणिक तयारीबाबत सखोल मार्गदर्शन दिलं.
अगस्ती डिफेन्स अकॅडमी या मोफत प्रशिक्षण केंद्रात दररोज एक तास स्पर्धा परीक्षा मार्गदर्शन आणि एक तास मैदानी प्रशिक्षण असे नियोजन आहे..प्राध्यापकांच्या मार्गदर्शनाखाली विद्यार्थ्यांना गुणवत्तापूर्ण तयारीसाठी प्रोत्साहन दिले जात आहे.
हा उपक्रम आदिवासी व ग्रामीण विद्यार्थ्यांसाठी खऱ्या अर्थाने भविष्याचा दिशादर्शक ठरत आहे.
या कार्यक्रमाचे यशस्वी आयोजन अगस्ती डिफेन्स अकॅडमीचे समन्वयक महेश पाडेकर, प्रमुख योगेश उगले, आनंद चौधरी, संगीता नवले यांनी केले.
कार्यक्रमाचे सूत्रसंचालन प्रा. महेश पाडेकर यांनी त्यांच्या दमदार आवाजात केले, तर आभारप्रदर्शन पर्यवेक्षक श्री. विवेककुमार वाकचौरे यांनी व्यक्त केले.
या दोन दिवसांच्या कार्यशाळेत शिक्षक, प्राध्यापक, पोलीस अधिकारी आणि विद्यार्थी मोठ्या संख्येने उपस्थित राहून प्रेरणादायी वातावरण निर्माण झाले.
