कंत्राटी कामगारांच्या प्रश्नां बाबत महापारेषण कंपनीचे व्यवस्थापकीय संचालक मा.डॉ. संजीव कुमार यांच्या सोबत सकारात्मक बैठक
मुंबई- गुरुवार दि. 3 एप्रिल 2025 रोजी भारतीय मजदूर संघ संलग्न महाराष्ट्र वीज कंत्राटी कामगार संघाच्या वतीने महापारेषण कंपनीचे व्यवस्थापकीय संचालक मा.डॉ. संजीव कुमार यांच्यासोबत संध्याकाळी 5 वाजता महत्त्वपूर्ण बैठक पार पडली.
मानव संसाधन विभागाचे संचालक मा.सुगत गमरे यांच्यासोबत त्यांनी तातडीने बैठक आयोजित करून दिली असता या बैठकीत कंत्राटी कामगारांचे कंत्राटदारांकडून होणारे आर्थिक शोषण रोखण्यासाठी यंत्रणा तयार करणार असल्याचे त्यांनी सांगितले. तसेच महापारेषण कंपनीत कार्यरत कंत्राटी कामगारांना प्रत्येक भरती मध्ये जादा 10 गुण दिले जातील व त्यांना वितरण कंपनी प्रमाणे वयोमर्यादा 43 वर्षा पर्यंत केली जाईल.19% वेतनातील फरकाची रक्कम लवकर दिली जाईल, असे आश्वासन मिळाले.यावेळी महापारेषण कंपनीचे मुख्य औद्योगिक संबंध अधिकारी मा. भरत पाटील देखील उपस्थित होते
आय.टी.आय वायरमन ट्रेड च्या विद्यार्थ्यांना महापारेषण कंपनीतील भरती प्रक्रियेत सहभागी होण्यास संविधानाचा आदर राखत इतर 22 राज्या प्रमाणे त्यांनाही फॉर्म भरण्यास समान संधी व न्याय द्यावा अशी ठाम मागणी अध्यक्ष निलेश खरात यांनी केली असता या बाबत सकारात्मक विचार करू कोणावरही अन्याय होणार नाही याची पूर्ण दक्षता कंपनीचे संचालक मंडळ घेईल असे मा.गमरे म्हणाले.
या बैठकीस संघटनेचे प्रमुख मार्गदर्शक मा.अण्णाजी देसाई, अध्यक्ष निलेश खरात, कार्याध्यक्ष अमर लोहार, सरचिटणीस सचिन मेंगाळे, संघटनमंत्री उमेश आणेराव, तसेच वायरमन ट्रेड प्रतिनिधी शुभम राठोड (यवतमाळ) आणि उमाकांत गिरी (अहिल्यानगर) व कल्याण झोन अध्यक्ष मनोज मनोचारी उपस्थित होते.
लवकरच या विषया साठी राज्याचे मुख्यमंत्री व ऊर्जामंत्री मा.देवेंद्र फडणवीस यांची भेट घेणार असल्याचे भारतीय मजदूर संघाचे उपाध्यक्ष सचिन मेंगाळे यांनी संगितले.
संघटनेच्या वतीने इतर 22 राज्यांतील पारेषण कंपन्यांचा तुलनात्मक अभ्यास अहवाल व केंद्र शासनाच्या विविध परिपत्रकांचा अभ्यास अहवाल कंपनीकडे सादर करणार असल्याचे कार्याध्यक्ष अमर लोहार यांनी सांगितले
