दत्ता ठुबे
पारनेर/प्रतिनिधी :
पारनेर तालुक्यातील मांडवे खुर्द येथे शेतकऱ्यांच्या हक्कासाठी लढणा-या भूमिपुत्र शेतकरी संघटनेच्या वतीने स्वाभिमानी शेतकरी संघटनेचे संस्थापक खासदार राजू शेट्टी यांच्या प्रमुख उपस्थितीत ऊस परिषदेचे भव्य आयोजन। केले आहे
बुधवारी २ नोव्हेंबर रोजी स्वाभिमानी शेतकरी संघटनेच्या प्रदेश युवती अध्यक्षा पूजाताई मोरे या उपस्थित राहणार . असल्याचे भूमिपुत्र शेतकरी संघटनेचे संस्थापक संतोष वाडेकर यांनी सांगितले .
श्री. वाडेकर बोलताना म्हणाले की, शेतकऱ्यांच्या विविध मागण्या ऊस परिषदेत मांडून त्यावर आवाज उठवला जाणार आहे. त्यासाठी स्वाभिमानी शेतकरी संघटनेचे संस्थापक खा. राजू शेट्टी हे शेतकऱ्यांना मार्गदर्शन करणार आहेत तसेच ओला दुष्काळ जाहीर करून शेतकऱ्यांना सरसकट हेक्टरी १ लाख रूपयांची मदत मिळावी, शेती पंपाचे भारनियमन रद्द करून विनाकपात दिवसा १२ तास विज मिळावी, काटा मारीत होत असलेली लूट थांबवून सर्व कारखान्याचे काटे ऑनलाईन करून नियंत्रित प्रणाली विकसित करण्यात यावी, रिकव्हरी चोरून होत असलेली शेतकऱ्यांची लूट थांबवावी अशा प्रमुख मागण्या असणार आहे. शेतकऱ्यांच्या हिताच्या दृष्टीने ही ऊस परिषद होणार आहे. या परिषदेत नगर जिल्ह्यातील जास्तीत जास्त शेतकऱ्यांनी उपस्थित राहावे असे आवाहन भूमिपुत्र शेतकरी संघटनेचे संस्थापक संतोष वाडेकर यांनी शेतकरी बांधवांना केले आहे.
