मुख्यमंत्र्यां समवेत महसूलमंत्री विखे पाटील यांनी विद्यार्थ्यांची केली आस्थेने चौकशी
रत्नागिरीतून साधला संवाद, मुलांची काळजी घेण्याचे दिले संबंधितांना निर्देश
दत्ता ठुबे
अहमदनगर- शिर्डी येथे उपचार सुरू असलेल्या ८४ विद्यार्थी व ४ शिक्षकांची दुरदृश्यप्रणालीच्या माध्यमातून राज्याचे मुख्यमंत्री एकनाथ शिंदे यांच्यासमवेत महसूलमंत्री तथा अहमदनगर जिल्ह्याचे पालकमंत्री राधाकृष्ण विखे पाटील यांनी आस्थेने चौकशी केली. रत्नागिरी येथून हा संवाद साधत शिर्डी उपविभागीय अधिकारी गोविंद शिंदे आणि संबंधितांना मुलांची काळजी घेण्याचे निर्देश दिले. यावेळी राज्याचे शालेय शिक्षणमंत्री दीपक केसरकर देखील उपस्थित होते.
अमरावतीतील आदर्श हायस्कूल दर्यापूर येथून २३० मुले आणि १५ शिक्षक शिर्डीत आले होते. शेगाव, अहमदनगर येथून ते सर्वजण रात्री देवगडकडे जाणार होते. गुरुवारी १६ फेब्रुवारी रोजी दुपारी शेगाव, अहमदनगर येथे त्यांनी स्वतः तयार केलेले जेवण जेवल्यानंतर रात्री १० च्या सुमारास त्रास जाणवल्यामूळे त्यातील ८४ मुले आणि ४ शिक्षकांना उपचारासाठी साईनाथ रुग्णालयात दाखल करण्यात आले होते. सद्यस्थितीत रुग्णालयात उपचार सुरू असून, प्रकृती स्थिर असल्याची माहिती आहे.
