विलास तुपे
. राजूर /प्रतिनिधी:
सत्यनिकेतन संस्थेचे सचिव तथा ॲड मनोहरराव देशमुख महाविद्यालयाचे माजी प्राचार्य टी एन कानवडे यांना शासनाचा आदिवासी विकास विभागाचा आदिवासी सेवक पुरस्कार जाहीर झाला आहे.
राज्यात आदिवासींच्या सर्वांगीण विकासासाठी उल्लेखनीय काम करणा-या व्यक्तींना व सामाजिक संस्थांना प्रोत्साहन देण्याच्या व त्यांच्या कार्याचा गौरव करण्याच्या उद्देशाने राज्य शासनामार्फत व्यक्ती व संस्था यांना अनुक्रमे आदिवासी सेवक पुरस्कार व आदिवासी सेवा संस्था पुरस्कार राज्य सरकार दरवर्षी प्रदान करून त्यांच्या कार्याचा गौरव करत असते.
२०१९ ते २०२३ या वर्षांतील पुरस्कार हा कोरोना परिस्थिती व काही अपरिहार्य कारणांमुळे देण्यात आलेला नव्हता. या चार वर्षांतील एकत्रित पुरस्कार आदिवासी विकास विभागाने नुकतेच जाहीर केले आहेत.कानवडे यांनी सन १९९३-९४ पासून आदिवासी भागातील राजूर येथील ॲड मनोहरराव देशमुख महाविद्यालयात प्राचार्य म्हणून शैक्षणिक व सामाजिक कामास सुरुवात केली.या काळात त्यांनी आदिवासी विद्यार्थ्यांचा शैक्षणिक दर्जा उंचावण्यासाठी व सामाजिक कामात वेगवेगळे उपक्रम राबविले.
२०१७ पासून ते अकोले तालुक्यातील आदिवासी भागातील राजूर येथील सत्यनिकेतन संस्थेत सचिव म्हणून काम पाहत आहेत.
अकोले तालुक्यातीलच सखाराम ठका गांगड यांना २०२०-२१ आणि फोफसंडी येथील दत्तात्रय हनुमंता मुठे यांना सन २०२२-२०२३ चा आदिवासी सेवक पुरस्कार जाहीर करण्यात आला आहे.
