चोंडी: गेली पंधरा वर्षे शरद पवार राज्यसभेचे खासदार आहेत. मग ते मागच्या दाराने आले आहेत का? असं त्यांना म्हणायचं आहे का? जर शरद पवार हे त्यांचे सख्खे आजोबा असते तर ते असं बोलले असते का असा प्रश्न उपस्थित करत रोहित पवार यांनी भुरटं चॅलेंज देऊ नये, गोलमाल करायचं नाही, काय असलं तर थेट असे म्हणत आमदार राम शिंदे यांनी पुन्हा एकदा आमदार रोहित पवार यांना आमदारकीचा राजीनामा देण्याचे ओपन चॅलेंज दिले.
आमदार राम शिंदे यांच्या चोंडी येथील निवासस्थानी दिवाळी फराळ कार्यक्रमाचे आयोजन करण्यात आले होते. यावेळी आमदार राम शिंदे पत्रकारांशी बोलत होते. राम शिंदे विधान परिषदेचे आमदार झाल्यानंतर रोहित पवार यांनी त्यांना राजीनामा देऊन जनतेतून निवडून येण्याचे आव्हान दिले होते. यावर राम शिंदे यांनी पलटवार केला.
यावेळी आमदार राम शिंदे म्हणाले की, दिवाळी फराळ कार्यक्रमास आरोग्य मंत्री तानाजी सावंत हे चोंडीला आले होते. मंत्री महोदयांनी माझ्या दिवाळी फराळ कार्यक्रमाला भेट दिली, त्यांना देखील दहा फोन करून सांगितलं, साहेब नका ना जाऊ, साहेब नका ना जाऊ माझ्या मतदारसंघात, अरे, माझे आणि तानाजी सावंत यांचे मित्रत्वाचे संबंध आहेत, असं कुठं असतं का राजकारणात, असे म्हणत राम शिंदे यांनी आमदार रोहित पवार यांच्यावर आरोपांचा धुराळा उडवून दिला.
आमदार राम शिंदे हे मागच्या दाराने आमदार झाले आहेत, अशी टीका आमदार रोहित पवार आणि विरोधकांकडून सातत्याने होते. यावर बोलताना आमदार शिंदे म्हणाले, मला ज्या मुद्यावरती टोकलं, मागच्या दाराने आलेत, मी विधान परिषदेेवर आमदार झालोय हे मला मान्य, 2019 साली माझा पराभव झाला हेही मला मान्य आहे. परंतु शरद पवार गेली 15 वर्षे मागच्या दाराने खासदार आहेत आणि दैनंदिन राज्य आणि केंद्र सरकारला ते सल्ले देतात, मग माझ्यावर हे बोलतात मागच्या दाराने, तर त्यांना असं म्हणायचयं का? पवार साहेब देखील मागच्या दारानेच…? पवार साहेब हे त्यांचे सख्खे आजोबा असते तर त्यांनी असं म्हटले नसते, चुलत आजोबा असल्यामुळे कदाचित त्यांनी वक्तव्य केलं असावं, असा खोचक टोला मारत आमदार शिंदे यांनी आमदार पवार यांचा समाचार घेतला.
मी हाडाचा कार्यकर्ता आणि कार्यकर्त्याचा नेता झालो, मंत्री झालो, आणि म्हणून मी त्यांचे चॅलेंज स्विकारलं, पण विधान परिषदेच्या आमदारकीच्या राजीनामा देऊन निवडणूक लागत नाही, त्यासाठी विधानसभेच्या आमदाराने राजीनामा दिला तरच निवडणूक लागेल. निवडणूक लागली कि मीही राजीनामा देऊनच तुमच्या पुढे उभा राहीन, मी बिगर राजीनाम्याचा पुढं उभा राहणार नाही. त्यामुळे राजीनामा आता विधानसभेच्या आमदाराने देणे अपेक्षित आहे. मी जर राजीनामा देऊन निवडणूक लागली असती तर मीही दिला असता, असे म्हणत आमदार शिंदे यांनी पुन्हा एकदा रोहित पवारांना आमदारकीचा राजीनामा देण्याचे खुले अव्हान दिले.
भुरटं चॅलेंज देऊ नये, गोलमाल करायचं नाही, काय असलं तर थेट, त्यामुळे चॅलेंज मी पण दिलय, राजीनामा देऊन त्यांनी मैदानात उतराव, बघू कर्जत-जामखेडच्या जनतेच्या मनात काय आहे ते, आणि मी देखील राजीनामा देऊनच पुढे उभा राहीन, असे म्हणत आमदार शिंदे यांनी मी निवडणूकीस सज्ज आहे असा इशारा दिला.
