वासुंदे येथे फळबाग लागवड प्रशिक्षण शिबिर
पारनेर/प्रतिनिधी :
वासुंदे येथे साय ट्रीज एन्व्हायर्नमेंटल ट्रस्ट आणि देवकृपा फाऊंडेशन यांच्या संयुक्त विद्यमाने आयोजित मोफत फळबाग लागवड कार्यक्रम व एकदिवसीय प्रशिक्षण शिबिरास टाकळी ढोकेश्वर परिसरातून मोठा शेतकऱ्यांचा उत्स्फूर्त प्रतिसाद मिळाला. या शिबिराचे उद्घाटन सुजित झावरे पाटील यांच्या हस्ते झाले.
पर्यावरण संवर्धन आणि शाश्वत शेतीला प्रोत्साहन देणाऱ्या या उपक्रमात परिसरातील ४५० हून अधिक शेतकऱ्यांनी नोंदणी करून सहभाग नोंदवला.सुजित झावरे पाटील यांनी शेतकरी आणि पर्यावरणप्रेमींना या योजनेचा लाभ घेण्याचे आवाहन केले. ते म्हणाले, “हा उपक्रम शेतकऱ्यांच्या आर्थिक उन्नतीसोबतच पर्यावरण संवर्धनासाठी महत्त्वाचा आहे.
मोफत रोपांचा लाभ घेऊन शेतकऱ्यांनी आपली शेती समृद्ध करावी.” या उपक्रमांतर्गत आंबा, चिक्कू, चिंच, जांभूळ, मोसंबी, संत्री, फणस, आवळा यांसह बांधावर लागवडीसाठी रक्तचंदन, मोहगनी, सागवान आणि मोह या वृक्षांचे मोफत वाटप केले जाणार आहे.प्रशिक्षण शिबिरात फळबाग लागवडीचे नियोजन, देखभाल आणि वृक्षसंवर्धन याबाबत तज्ज्ञांनी मार्गदर्शन केले.
शेतकऱ्यांना आधुनिक शेती तंत्रज्ञान आणि पर्यावरणपूरक पद्धतींची माहिती देण्यात आली. यावेळी मंडळ कृषी अधिकारी सोपान शिंदे, कृषी पर्यवेक्षक आशिष दिवटे, सहायक कृषी अधिकारी देवराम नवले, पारनेर बाजार समितीचे माजी सभापती अरुणराव ठाणगे, पंचायत समिती सदस्य अमोल साळवे, चैतन्य जोशी, ऋषभ मांडगे, दादा वाघमोडे, चेअरमन संजय भोर, संतोष गाढवे, कासारे सरपंच शिवाजी निमसे, दादा कोल्हे,वासुंदे गावचे उपसरपंच शंकर बर्वे, सोसायटीचे चेअरमन नारायण झावरे पो. मा. झावरे, विलास साठे, लहानू झावरे, दिलीप पाटोळे, बाळासाहेब झावरे, भास्कर दाते, दत्तात्रय गांगड आदी ग्रामस्थ व शेतकरी वर्ग मोठ्या संख्येने उपस्थित होता.
हा उपक्रम शेतकऱ्यांना आर्थिकदृष्ट्या सक्षम करत पर्यावरण संरक्षणाला चालना देणारा आहे. शेतकऱ्यांनी या संधीचा लाभ घेऊन आपल्या शेतीला नवीन दिशा द्यावी, असे आवाहन आयोजकांनी केले.
